عینوانی شیعرەکە لە دیوانی چاپی ئەنیسیدا "بەستە زمان"ە.

ساڵی گوترانی شیعرەکە لە چاپی ئەنیسیدا نییە.

شاعیر لە شیعرەکەدا هەمان ئەو بێ هیواییە دەردەخات کە لە زۆر شیعری دیکەشیدا دووپاتی کردۆتەوە: ئێش و حەسرەت لە دڵمدایە، کوندم و وێرانە نشینم، بێ نەزم و نەسرم، لانەوخوارم، ڕەئیسی خێڵی بێچارانم، فەقیرم، ڕیشەم لەبن هات و....

 لە عەینی کاتدا چاوێکی لە ڕابردووی خۆیەتی و یادی بەخێری دەکات: ئەفسەح بووم و ئێستا بێ نەزم و نەسرم؛ بەحیلە و فێڵ و نیرەنگ بووم و ئێستا بەستەزمانم.

پەڕوباڵ ڕەنگە بەم ڕۆژانە بگرم: بەهۆی ئێش و حەسرەتی دڵەوە، واهەیە بەم ڕۆژانە پەڕوباڵ بگرم!

پەڕوباڵ گرتن: غەزەب لێگیران و بێچارەیی.

وێرانە قەسر: قەسری کاول و وێران؛ ئاماژە بەو باوەڕە خورافییەی کە لە نێوگەلانی ناوچەی ئێمەدا باوە و دەگوترێت کوند تەنیا لەسەر وێرانە دادەنیشێت، تەنانەت ئەگەر شوێنەکە ئاوەدانیش بێت دوای نیشتنی ئەو وێران دەبێت. چاپی جەعفەر وەک 'وێرانە قەبرم' ی تۆمار کردوە کە واتای پێویست ناداتەوە و لام وایە دەبێ هەڵەی چاپ بێت، مەگەر 'وێرانە قەبری'ش لە سەر زمانی خەڵک بێت و من ئاگاداری نەبم.

ئەفسەحێ بووم: ڕەوانبێژترین کەسی ناو کۆڕی ئەدیبان بووم و ئێستا شیعر و پەخشانم نەماوە.

لانەوخوار: پێچەوانەی 'لانەوبان'. ماڵی لای خوارەوەی چیا. ئاماژەیە بەوەی کەروێشک دەستی لە لاقەکانی کورتترە و باش دەتوانێت سەرەوژوور لەدەست ڕاوچی ڕابکات بەڵام لە هەڵاتنی سەرەوخوار زۆر چێ نییە و ناتوانێ بە هاسانی خۆ بگەیێنێتە لانی خۆی و تانجیش زووتر دەیگرن. کەروێشکی لانەوخوار: کەروێشکێک کە کەوتۆتە لاوازیی و لەدەست تانجیی ڕاوچی بەرەوخوار هەڵدێت. شاعیر دەڵێ من لەبەر چاوی خەڵک، وەک شێر و بەبری ئازا دەنوێنم، بەڵام لە ڕاستیدا واش نیم!

شاعیر لە ڕەئیس و ئەنیس جیناسی ناتەواوی دروست کراوە.

ئەندووه: خەم

زەیقەت: 'ضیقة' ی عەرەبی: تەنگی و تەنگدەستی و ناڕەحەتی لە ژیان

نەیڕەنگ: نیڕەنگی فارسی، فێڵ

ئەوێستێ: ئێستا

حەدیسی ئەحمەدە: ئەحمەد: یەک لە ناوەکانی پێغەمبەری ئیسلامە. گوایە ابی موسی ناو لە پێغەمبەری ئیسلامی گێڕاوەتەوە کە گوتوویەتی شانازی بە هەژارییەکەم دەکەم.

چ تاڵ وتوونە، چاوم، عومری خدرم: چاوەکەم، ئەو تەمەنە درێژەی من چ تاڵ و توونە!

توون: جەهەننەم، ئاگردانی گەرماو (هەنبانە بۆرینەی مامۆستا هەژار). تاڵ و توون دەبێ لەسەر زمانی خەڵک هەبێت و هەردوو وشەکە یەک واتا یان واتای هامشێوەی یەکتریان هەبێت.

خدر: خضر، پێغەمبەرێکی بەنی ئیسڕائیلە، ناوی بە هەمیشەیی بوون و زیندوومانەوە دەرکردووە. شاعیر، بە پێچەوانەی 'خدری زیندە'، لێرە و لە چەند شیعری دیکەدا ناڕەزایە لەوەی تەمەنی زۆرە و ژیانی ئەم دونیایەی بۆچی کۆتایی نایەت؟ دەڵێ عومرێکی درێژم بووە بەڵام تاڵ و توون و ناخۆش بووە.

بەزیندوویی....: گلەیی شاعیرە لە هاوڕێکانی.  ئاوات لە شیعرەکانیدا کەمتر واهەیە گلەیی و بناشت لە دۆست و برادەری خۆی بکات. بەڵام لێرەدا دەڵێ هیچیان لە ماوەی ژیانمدا کەلکیان بۆم نەبوو، هیچ نەبێ زیندوومانەوە و بەڵکوو ئەوەندە خێرم بۆ بدەنەوە کە بمنێنە ناو قەبر! شاعیر لە ساڵی گوترانی شیعرەکەدا ٦٨ ساڵان بووە.

بەحری عەرووزیی شیعرەکە:

هزج مسدس محذوف: مفاعیلن مفاعیلن فعولن