لەو وەختەوە بردوویە دڵم چاوی عوقابی

ئەو مەست و ئەمیش خەستە عەجەب بۆتە کەبابی!

ڕووترشە ئەگەر ساقی، مەزەی بوو بە مەزاقم

خوێنی جگەری عاشقیش ئەم جارە شەڕابی

ئەو نێرگسە پڕفیتنەیە وا مەست و خەواڵوو[1]

بەو حاڵەوە بردوویە، بڵێ مەیدە عەزابی[2]

برژاوە بە تینی نەفەس و ئاهی دەروونان[3]

زۆر ناسکە، چڕژا بە ئیشارێکی جەنابی

هەرکەس نەشکێنێ دڵی وەک شووشەیی عاشق[4]

ڕەحمەت لە هەموو قەوم و کەس و دایک و بابی[5]

وێنەی قەد وباڵای کە لە نێو چاوی پڕئاوە

سەیری کە چلۆن دێتە مەلە مورغەکی ئابی

            "کامیل" کە لە دووی دڵ چوو، تەماشاکە بە کوڵ چوو[6]

            مەنعی مەکە ساقی، وەرە بێ دەرد وبەڵابی!

                                    قاقڵاوا، ١٣٤٠ ی هەتاوی

(لاپەڕە ٦٥ ی چاپی ئەنیسی. لە چاپی جەعفەردا نییە)

_________________________________________ 

شیعرەکە لە چاپی جەعفەردا نەهاتووە.

غەزەلێکی غەرامیی پاراو و بێ گرێ وگۆڵە و لە کەرەسەی کۆنی شیعری عاشقانەی کوردی و فارسی پێکهاتووە. دڵی بە کەباب برژاوی عاشق و خوێنی جگەری بە شەڕاب کراو و چاوی مەخموور و خەواڵوو  و..... کەرەسەی سواوی ئەو چەشنە شیعرانەن کە بۆ شاعیری ئەمڕۆیی ئەستەم بتوانن خوێنەر بدۆزنەوە.  لەگەڵ ئەوەشدا شیعرەکە ڕەوان و پاراوە و لە گوێی خوێنەر خۆش دێت. لام وایە یەک لە شیعرە قورس و قایمەکانی ئاوات بێت.

عوقاب: هەڵۆ

خەستە: بریندار، نەخۆش

مەست و خەست: جیناسی ناتەواویان لێ پێکهاتووە.

مەزە: ئەو خواردنەی وا لەگەڵ مەی دا دەخورێت.

مەزاق: هەنبانە بۆرینەی مامۆستا هەژار بە 'ئیشتیا' و 'چێژە'ی واتا لێداوەتەوە. لێرەدا "تامی دەم"ە.

نێرگس: گوڵێکە و لە لای شاعیرانی کورد و فارس ئیستیعارەیە بۆ چاوی دڵدار.

بەو حاڵەوە بردوویە: دەگەڕێتەوە بۆ دڵ.

چڕژان: چەشنە شکانێکە زۆرتر وەک سیفەتێک بۆ شووشە کەڵکی لێ وەردەگیرێت.

دایک و بابی: ئەو فەردەی شێخ ڕەزای تاڵەبانیمان وەبیر دێنێتەوە کە لە غەزەلە بەناوبانگەکەی "مەربووتە حەیاتم بە سلێمانی و خاکی"دا، کاتێ لە "ئەحمەدی کاکی" واتە کاک ئەحمەدی سلێمانی دەدوێت، دەڵێ:

"دەرحەق بە حەفیدانی ئەدەب لازمە زینھار
قوربانی حەفیدانی دەبم بابی و داکی" 

مورغەک: باڵندەی بچووک

مورغەکی ئابی: مراوی بچووک، باڵندەیەکی بچووک کە لە ئاودا مەلە دەکات.

دڵ و کوڵ: جیناسی ناتەواویان پێ دروست کراوە.

بەکوڵ چوو: بە جۆش و کوڵەوە ڕۆیشت؛ هاتە کوڵ؛ چوو دەتوانێ واتای لەدەستچوون و فەوتانیش بداتەوە.

بێ دەردوبەڵابی: دۆعایە و تەنز و تەوسێکی گلەیی ئامێزیشی تێدایە.