بەهار هات، تواوە بەفری ناو شاخەکان

شەماڵ هات گەشاوە خونچەی ناو باخەکان

زەینم دا، لە نێو باخ، شۆخێ وا دەگەڕێ

دڵ کەوتە کوتەکوت، چاوم بۆی دەپەڕێ

باخەوان لەحاند ڕۆژ چاوی قەت هەڵنایە

دەڵێ چۆن سەرنجێک بدەم لەو باڵایە

تا وڵات بێدەنگە، باخەوان نووستووە

تا بەهار سەوز و سوور فەڕشی ڕاخستووە

لە سەر ئەو ڕایەخە، ئەمن و ئەو پێکەوە

هەڵپەڕین، دانیشین، وەرکەوین، ژین ئەوە!

تنۆکی ئارەقی لەسەر ئەو کوڵمانە

وەبزانم لەسەر گوڵ تنۆکی بارانە

هەڵڵایە، هەرایە، لەناو باخ لە داخان

خاوەن باخ، کۆست کەوتوو، سەیر ئەکا لە باخان

بەهار هات، بەخێر بێ بە تەپڵ و تۆپەوە

با بڕوا زمهەریر بە خۆی و سۆبەوە!

            "ئیمامی"ش تواوە وەک بەفری کێو و شاخ

            لە دووریی یاری خۆی کەوتۆتە ئاخ و داخ!

(لاپەڕە ١٨٥ و ١٨٦ ی چاپی ئەنیسی؛ لە چاپی جەعفەردا نەهاتووە)

______________________________________

غەزەلێکی ساکاری غەرامییە و لە عەینی کاتدا پڕە لە وەسفی سروشت.

کێشی شیعرەکە، شێوازی دەربڕینی هەست و وێنەسازییەکان هەمووی تا ڕادەیەک لە شیعری مامۆستا گۆران دەچن.

شاخ: چیا، کێو

لە حاند: لە شوێنی. )هەنبانە بۆرینەی مامۆستا هەژار حاندی ئاوا واتا کردۆتەوە: جێگایەکی دیاریکراو(.

ڕایەخ: فەڕش یان شتێک کە لەسەر زەوی ڕادەخرێت.

وەرکەوتن: پاڵدانەوە،  بە ئیستراحەتەوە دانیشتن و ماندوو حەساندنەوە

تنۆک: قەترە

هەڵڵا: دەنگ و سەدای زۆر

کۆست کەوتوو: کۆست یاریدە و بەخت و تاڵەیە و کۆست کەوتوو: بەدبەخت (هەنبانە بۆرینە)

تەپڵ و تۆپی بەهار: دەنگی گرمەی هەورە

زمهەریر: سەرما وسۆڵی سەختی زستان.  هەروەها، بە گوێرەی ئەفسانە، شوێنێکە لەو دنیا کە لە نێوان بەهەشت و دۆزەخدایە و ساردە.

سۆبە: کوورە