دیوانی نوێی شیعره‌کانی سه‌ید کامیل ئیمامی (ئاوات)

نووسین و ئاماده‌کردنی:  ئه‌نوه‌ر سوڵتانی

 شیعری ژمارە ٢٢٩

پێناو

 

 

کە برژۆڵم لەسەر چاوم شەتڵ بوو

بە دڵ زانیم لە ژێر پێتا چەقڵ بوو

سەر و چاوم بە جووت ڕۆنا لە پێناو

نەشت وێرا قەدەم دانێیە سەر چاو

بە ڕێی تاریک و باریکی خەیاڵم

بەڕێ بووی، چووی، دڵت بردم، دەناڵم

لە دووی ئەو پارچە گۆشتەی کوفتەیی دەست

بە دووی ئەو نەختە خاڵەی عاشق و مەست

وەدووی کەوتم دەر و دەشت و بیابان

کەژ و کێو، قوژبن و ئاوا و وێران

            بزانم داخۆ مەڵبەندی لە کوێیە

            دەوای ڕوون و هیوایی ئەو بە کێیە

                                    زەنبیل، ١٣٥٤ ی هەتاوی

(لاپەڕە ٢٠٦ ی چاپی ئەنیسی، لە چاپی جەعفەردا نەهاتووە)

____________________________________

شیعرێکی غەرامییە. ساکار و ڕەوانە و وێنەی خەیاڵی دروست کردن بە شێوەی مامۆستا گۆران تێیدا بەرچاوە. باوەکوو ڕواڵەتی شیعرەکان لەیەکتر ناچن، بەڵام من بۆن و بەرامەی شیعری "سکاڵا"ی گۆران لەم شیعرە دەکەم:

"مەلی ناو فەزای ناموتەناهیم                                                                                            

  دڵی لاوم ڕۆ!                                        

 مانووی ئینتیزار ڕێی وەعدەی واهیم

 نووری چاوم ڕۆ!"

ئاوات شوێنی زۆری لە گۆران هەڵگرتووە و ئەوە تاقە یەک نموونەیەتی.

شیعرەکە ناتەواوە یان پەیامی شاعیر بۆ خوێنەر هەر ئەوەندەیە بڵێ عاشق بووم و بە شوێن دڵی وونبوومدا دەر و دەشت و بیابان و ئاوایی و کەلاوە گەڕام بەڵکوو بزانم لە کوێیە و هیوای بە کێیە. شاعیر لە درێژەدا ڕوونی ناکاتەوە ئایا دڵە وون بووەکەی دۆزیوەتەوە یان نا و ئەوە دەتوانێ خوێنەر بخاتە بیر کردنەوە و پرسیار لە خۆکردن سەبارەت بە چارەنووسی دڵی شاعیر بۆ ئەوەی بزانێت ئەو وونبوونە تەنیا بۆ ئەو دڵە نییە و زۆرێکی دیکەش هەن کە دڵیان وێڵی سەحرای ئەوینە و هەرگیزیش ڕێگەی گەڕانەوە نادۆزنەوە!

ئێمە پێشتریش چەند جار بینیومانە کە ئاوات خۆی لە دڵی خۆی یان لە عەقڵ و فامی خۆی بە جیا دادەنێت وەک سێهەم کەسێک باسیان لێوە دەکات. لێرەشدا دڵ لە شاعیر جیاواز دانراوە.

برژۆڵ: برژانگی چاو

شەتڵ: شتڵ (نشای فارسی) (هەنبانە بۆرینەی مامۆستا هەژار) شەتڵ بریتییە لە گیا و سەوزەیەک کە تازە سەری دەرهێنابێت و هەر لەو دۆخەشدا لەشوێنێکەوە ببرێتە شوێنێکی دیکە و لەوێ بچێنرێت- وەک شەتڵی برنج و گوڵ.

برژۆڵ لەچاو شەتڵ بوون بریتییە لە هەڵچەقینی برژۆڵ لە چاو. دیارە ئەوە ناخۆشە و ئازاری کەسەکە دەدات.

چەقڵ: چقڵ، دڕوو

ڕۆنان: دانان

لە پێناو: لە ڕێگەی، بۆ خاتری

ڕێی تاریک و باریکی خەیاڵ: تەعبیرێکی جوانە

کوفتەیی دەست: باش نازانم چییە؟ بەڵام کوفتە ئەگەر کوتراو بێت، 'کوفتەیی دەست' دەبێ واتای بە دەست کوتراوی هەبێت. ئەو دەستەش وا دڵی شاعیری کوتاوە جگە لە دەستی دڵدارەکەی دەستێکی دیکە دەتوانێ ببێت؟


 

www.rojhalat.de / www.bokan.de