عینوانی شیعره‌که‌ له‌ چاپی جەعفەر دا 'بەهاری ناخۆش' ە، کە بە وەرگرتنی دوو وشەی سەرەتا و کۆتایی فەردی مەتلەع، چەمکێکی نوێی دروست کردووە و کردوویەتە عینوان. دیارە شاعیر خۆی عینوانی بۆ شیعرەکان دانەناوە و ئەنیسی و جەعفەر بە سەلیقەی خۆیان کارەکەیان بەڕێوە بردووە. من نامەوێ شێوازێکی سێهەمیش بدەم بە عینوانەکان و هەر بۆیەش لە هەموو دیوانەکەدا بە گشتی شێوازەکەی چاپی جەعفەر ڕەچاو دەکەم و تەنیا هەندێک جار وەک ئەوەی ئێستا یەکەمیانم هەڵبژاردووە کە پێم جوانتر بوو و لە خودی شیعرەکەش وەرگیرابوو.

لە شیعرەکەدا وەسفی سروشت کراوە و بەهارێک کە، دیارە لەبەر سارد و سەرما، ناخۆش و بێ نەشە بووە. ئەگەرێک ئەوەیە کە شیعرەکە تەوسیفی بێت و ئاوات لە ژێر کارتێکەریی شیعرە ناسراوەکەی سەیفولقوزاتدا هۆندبێتەوە[1] و لە سەرما وسۆڵی زستانی ئەو ساڵە و درەنگ کەوتنی بەهاردوابێت؛ ئەگەرێکی دیکەش ئەوەیە شیعرەکە بە شیعری تەمسیلی بزانین و بڵێین ئەو ساڵی ١٣٤٧ ی هەتاوییە لووتکەی کێشە و ناکۆکیی نێوان ئەندامان و ڕێبەرانی حزبی دیموکراتی کوردستانی ئێران بوو، کە گەیشتە ئەنجامی لێک ترازان و جیابوونەوەی هەندێک لە ئەندامانی کومیتەی ناوەندی و پێشمەرگەی ئاسایی لە بەژنی سەرەکیی حزب و پێک هێنانی کومیتەی شۆڕشگێر، ئینجا کەوتنە ناو مەنگەنەی ساواکی ئێرانی لە لایەک و پاراستنی پارتی دیموکراتی کوردستان لە لایەکیتر و شەهید بوونیان. دەزانین سەید کامیل خۆیشی بۆ ماوەیەک ئەندامی شانازیی کومیتەی ناوەندیی هەمان حزب بوو.

ئەوەی کە ئەگەری دووهەم بەهێز دەکات چەند خاڵێکە:

１.                        دەڵێ: "کۆرپەی نەتەوە بێ گەشەیە"، کە نابێ چەمکی نەتەوە بە خۆڕایی و بێ ئامانج هاتبێتە ناو شیعرەکەوە؛

２.                        فەردی تەقتیع کە تێیدا دڵخۆشیی خەڵک بە شتێکی دەسکرد و ناڕاست دەزانێت، واتە دەیەوێت بڵێت ژیانی خەڵک تاڵە و بۆ ئەوە نابێ دڵخۆش بن، ئەگەریش دڵخۆشن، پاکی فێڵ و تەلەکە و درۆ و فشەیە دەیکەن، دەنا چۆن دەبێ لە هەل و مەرجێکی وا ناخۆشدا ئەوان دڵخۆش بن!

３.                        ئەگەر لەگەڵ ئەگەری دووهەمدا بین، ئەوا بۆی هەیە بتوانین کۆتر و قومری و کەوی کێویش بە تەمسیلی پێشمەرگە بزانین.

بەڵام لە لایەکی دیکەوە، ئەستەمە شاعیر پێشمەرگەی بە قەل و داڵ شوبهاندبێت و هەر بە گشتیش شاعیرێکی وەک ئاوات کە خاوەن بیروباوەڕی سیاسی بووە، پێویست ناکات لە هەموو وشە و ڕستە و فەردێکدا ئەو بەرپرسیایەتییە بخاتە ڕوو. مرۆڤی سیاسیش دەکرێ وەک خەڵکی ئاسایی ڕقی لە سەرما وسۆڵی زستان ببێتەوە و بەهاری پێ خۆش بێت و چەپۆکێک لەویان بنێت و بەخێرهاتنی ئەمیان بکات!

چەند وشە و عیبارەی ناو شیعرەکە:

ڕێکی، هەمووی

بە جەم، پێکەوە بە سەر یەکەوە

وەڕەز، بێزار

پێی نەماوە گوڕە؛ بێ کەیفە؛ لە پاشەکشەیە: هەرسێک دەگەڕێنەوە بۆ کەوی کێوی

گامێش، کەڵی مێ، یان بوفالۆی مێ، لە دەشتایی و سەر چۆم و لێڕەوار دەژین و جاران لە موکریان گەلێک زۆر بوون.

موبتەلا، عەرەبییە بە واتای تووش بوو

سەدەمە یان صدمە، عەرەبییە بە واتای زیان پێگەیشتوویی

خش خشە، نەخۆشییەکی ئاژەڵە

به‌حری عه‌رووزیی شیعره‌که‌:

رمل مثمن مخبون محذوف: فعلاتن فعلاتن فعلاتن فعلن