عینوانی شیعرەکە لە چاپی ئەنیسیدا 'ئیمامی دڵ پڕ' ە، کە ئەویش وەک ئەم، لە دەقی شیعرەکە وەرگیراوە.

شیعرێکی دڵداریی تەنزئامێزە. شاعیر لە ساڵێکدا کە شیعرەکەی گوتووە، ٦٠ ساڵان بووە. من کاتێ ناوەرۆکی تەنزئامێزی شیعرەکە و تەمەنی شاعیر پێکەوە دەگرمە بەرچاو، دەبینم شاعیر وێناچێت بە ڕاستی ئەوینداری شۆخێکی جەرگبڕ بووبێت، کە وابوو لێرەشدا وەک زۆر شیعری دیکە، دڵدارەکەی خەیاڵیی بووە، مەگەر بڵێین کەوتۆتە بیری ئەوینداریی کۆنی سەردەمی لاویەتی خۆی کە ئەوە لە ڕاست دەچێت و لە شیعرەکە دەردەکەوێت: "ماوێکی زۆر بوو ئەویندارت بووم" و فەردەکانی دوای ئەویش کە لە هەموویاندا باسی ڕابردووی زووە، نەک سەردەمی گوترانی شیعرەکە.

ئەوەش کە دەڵێم تەنز لە شیعرەکەدا هەیە، بە حیسابی شێوازی گلەییەکانە: جوابی خۆشی تۆ هەر پێکەنین [بە من] بوو"؛ "لەسەر من کەچی لێتدا قڕ و فڕ". ئەو قڕ و فڕە تەعبیرێکی خۆماڵی نییە و لە زمانی وتووێژی خەڵکی ئاسایی ئێران (زمانی فارسی) وەرگیراوە، بۆ شیعری جیددیی شاعیرێکی 'دڵ پڕ'ی کوردیش نابێت. لە شوێنی دیکەی دیوانەکەشدا ئەو تەنزە لە قەڵەمی ئاوات کەوتۆتەوە و من پێشتر ئاماژەم پێکردووە.

ئاوات شیعرێکی فارسی لاهووتی کرماشانی کردۆتە کوردی: "وەکوو بیستم، خەمت خواردم، ئەویش بۆ من خەمێکی دی"[1] (بڕوانە بەشی ٢٦ ی ئەم زنجیرەیە). بەم پێیە، دەبێ ناسیاوی شیعری لاهووتی بووبێت. من لەم غەزەلەی ئێستاشیدا کارتێکەریی شیعرێکی لاهووتی دەبینم کە مامۆستا هێمن کردوویەتە کوردی، بەڵام کارتێکەرتییەکە ئەوەندە نییە زۆر بەرچاو بێت و دوای ئەوەش، شیعری لاهووتی ئەو تەنزە نەرم و نیانەی تێدا بەدی ناکرێت:

"عەزیزم بۆچی تۆراوی لەخۆڕا؟

چ قەوماوە دڵی تۆ بۆچی گۆڕا؟..."[2]

تەنانەت میسراعی: "هەر سکاڵام کرد، لێت پاڕامەوە..."،  واهەیە خوێنەر بخاتە بیری شیعری "سکاڵا" ی مامۆستا گۆران، کاتێ کە دەڵێ:

"لاتدا لە ڕێگای هەوای موحیببەت، دوورت خستەوە..."

سەرەڕای ئەو بۆچوونە دوور ونزیکانە، شیعری ئاوات سەربەخۆ لە هەردوک ئەو شاعیرانەیە و من بە شیعرێکی 'ئاواتی' و خۆماڵی دەزانم نەک تەرجەمەی شیعری خەڵکانی دیکە.

قڕ وفڕ: 'قڕ' ی فارسی بە تەنیا مانای خۆبادانی هەیە لە هەڵپەڕکێدا. قڕ وفڕ بە سەر یەکەوە دەبێتە شتێکی وەک لار ولەنجە، گەرچی لار ولەنجەی کوردی واتایەکی جوان و ئەرێ یی دێنێتە زیهنی خەڵکەوە، بەڵام قڕ وفڕ هەندێک نەرێنی و سووکە. ئاوات لە شیعرێکی دیکەشیدا قڕ وفڕی هێناوە، کە ئەویش هەر تەنزئامێزە:

"تا قڕ وفڕ نه‌کا به‌ فیز وبڵێ:

کۆرپه‌که‌ی من له‌ شیر بڕیومه‌ته‌وه!"[3]

وشەیەکی ئەستەم لە شیعرەکەدا نابینم کە باسی لێوە بکەم.

بەحری عەرووزیی شیعرەکە

متقارب مثمن اثلم (هجایی): فع لن فعولن // فع لن فعولن